يا خايب

احنا عارفين أن الحياة قوانين وكمان عقل الانسان بيحكمه قوانين، النهارده هتكلم عن قانون الحياة ومن اهم قوانين العقل الباط ايضا، قانون الوفره، ربنا لما خلق الكون خلق مياه تكفي كل البشر وهوا لكل الناس ونجاح لكل البشر وفرض لكل انسان
ومن حكمة ربنا ان الدنيا مليانه مياه وهواء ونجاح وفرص، عايز تسالني وممكن تكون فتحت عينيك من الدهشه أو حواجبك دلوقتي مش في مكانها، هتقول طب ليه مش كل الناس ناجحه وبتقدر تخلق الفرص؟ اقولك لانهم ميعرفوش قانون الوفره
خد الموقف دا: لو انت في حجره كبيره وفيها ناس الكل بتنفس صح، طيب هل اخر واحد بعيد عنك لو اتنفس هياخد نصيبك من الهوا؟؟؟ لا طبعا، طيب لو قفلت الباب مين اول واحد هيضر؟؟؟؟ اكيد انت وممكن تعمل جهاز يخلي كل الهوا اللي داخل ليك بس وتبذل مجهود لصنع الجهاز ومجهود للأستحواذ علي الهوا وترجع أخر الحجره تلاقي اخر واحد عنده شباك بيدخله هوا نقي من غير ما يتعب، مين اللي تعب؟؟؟ مين الخسران؟؟؟ اكيد انت، يعني الفرص والنجاح للأخرين مش هياخد من فرصك ونجاحك بالعكس هيساعدك، لو حاولت تستحوذ علي الفرص والنجاح لوحدك هتتعب والناس هتعديك، ولو وقفلت الباب هتكون خايب لانك اول المتضررين
حاجه غريبه، قانون الجذب بيقول الكون يتسم بالكرم يعني لو اديت لحد فرصه متستناش منه المقابل لانه هيجي من الكون، والكون من سننه انه اكرم منك يعني تدي لحد فرصه الكون يديك عشرة ودي قاعده ثابته سبحان الله انا حاسس ان دا كلمنا، دا دينا شرعنا، الكون مبيديش حد حاجه لان كل حاجه من ربنا وهو مسخر الكون، اعمل خير ادي فرصه لحد ترجعلك بعشر امثالها والله يضاعف لمن يشاء
محمد شاكر صحبي مدرب تنمية بشريه وبقوله يا شكورا من اكثر الناس المؤمنين بالقانون دا وبيطبقه ثقه بالله مش الكون، علشان كده انا ملاحظ كرم ربنا معاه، يا سيدي ما تخليك زي شكورا والله هتكسب، المتاجره مع الله عنده في الشرع وفي القرآن الكريم آيه بتقول: بسم الله الرحمن الرحيم" من ذا الذي يقرض الله قرضا حسنا فيضاعفه له اضعافا كثيرة والله يقبض ويبسط واليه ترجعون" ربنا من اسماءه الحسني الكريم، الكريم شوف طاقة الكلمة سبحانك يارب، يعني تحمد ربنا يزيدك، تدفع حاجه لوجه الله يردهالك عشرة واكثر،دا حاجه بينك وبين ربنا، انما لو بينك وبين عبد زيك ووفرتله فرصه او ساعدته علي النجاح ربنا يغيير علي اسمه الكريم فيديك اكثر مما تتصور، والله يا جماعة دا كلام مجرب وصح مليون في الميه
المهم: لو عاجبك القانون ابدا مارسه، خلي اتجاهك لله مش الكون، التركيز علي الوفره يجذب المزيد منها، متستناش رد الجميل وانتظر مكافئه ربنا، امن بالوفره امن بالمتاجره مع الله، ممكن تكون وقتها عبد رباني تقول للشئ كن فيكون، لو القانون عاجبك يلا ابدأ في الرد قول هتساعد الناس ازاي، لو مش هتبدأ دلوقتي هتكسل وتتأخر هنقولك كلنا في صوت واحد: يا خايب

محمد زكريا

المقهي الثقافي - يا خايب