موزا صحي يوم الجمعة وبعد مج الشاي بالبن المحترم والدش المتين راح يصلي الجعة وكمل اليوم واقف مع اصحابه علي ناصية البيت يجيبوا في سيرة دي ويبصو علي دي ... يلا شباب فرحان بنفسه ما علينا، بعد الغدا الي عملاه ماما نزل يلعب كوره ورجع اكيد محتاج دش ونزل يكمل قاعده علي القهوة يلعب استيميشن.... الاستيميشن دي موضوع فعلا كبير... اكتر حاجه نلاحظها في حياة موزا النظام والترتيب ... يعني الحقيقة مرتب وقته بشكل رائع... انتو عارفين موزا عنده كام سنه؟؟؟ موزه عنده 23 سنه بس عيني عليه عارف ومحدد ومخطط لحياته
نوفا يا عيني مطحونه لسه يا قلبي متخرجه السنادي واشتغلت في كول سنتر ... ابتدت معاهم تلي ماركتينج ونقلت بعد كده علي خدمة عملاء... دا غير انها بتاخد كورسات انجليزي وكمبيوتر... مش قلتلكم بنت بميت راجل
المهم موزا قابل نوفا وقالها ما تشوفيلي شغلانه معاكي
طبعا نوفا قلبها قلب خساية، قالتله طب يا موزا اخبار الانجليزي ايه؟؟؟
قالها ايه يا بنتي دا انا في كلية انجليزي انتي ناسيه ولا ايه؟؟؟؟ بس انا بعرف اقرا واكتب لكن مشكلتي في الكلام
طب يا موزا بلاها الانجليزي... الكمبيوتر باه؟؟؟؟؟
لاااااااااااااا الكمبيوتر دا مفيهوش مشكله خالص انا بعرف كمبيوتر كويس جدا
طيب يا موزا الحمد لله تعرف ورد يعني واكسل وكده... ولا ليك في البرمجه والكلام دا
مين ورد واكسل دا يا نوفا ... انا بعرف الانترنت.. وبتفرج علي اليوتيوب وبعمل شات يعني تمام
طبعا نوفا عنيها وسعت طيب مش مشكله نتعلم...اقولك عندي حاجه لطيفه ايه رايك تشتغل خدمة عملاء زيي.. انت ولد لبق وتعرف تعمل الشغلانه دي
يا نوفا يعني افضل طول النهار علي ارد علي تليفونات ... اقولك طيب مش مشكله
نوفا كلمت رئيسها ... قالت كلمتين حلوين علي موزا... رئيسها قالها طيب خليه بكره يجي يقابلني
تاني يوم اخر النهار نوفا كلمت موزا ...ها عملت ايه
رد موزا وقال ... انا رحت وعملت المقابله واتقبلت بس انا مش رايح
ليه با بني؟؟؟؟؟
اصل المرتب 1000 جنيه بس
طب ايه المشكله متبتدي وتاخد خبره وقريب من بيتك... عايز ايه تاني
لا يا نوفا المرتب قليل جدا.... امال انت عايز تشتغل بكام؟؟؟؟؟؟
مش اقل من 2000 جنيه دا غير التأمينات وياريت يكون فيه عربيه
بصلته نوفا ومعرفتش تقوله ايه... بس علشان الضغظ ميعلاش انسحبت في هدوء قبل ما ترتكب جريمة قتل مع سبق الاصرار والترصد
رشا خليفة
0 comments:
Post a Comment