لو فاكرين نوفا كانت بتشتغل ايه؟؟؟؟
نوفا كانت بتشتغل خدمة عملاء في كول سنتر وبتاخد كورسات كمبيوتر وانجليزي
المهم نوفا كانت دايما بتابع مع شركات التوظيف علشان تخرج من جو... الكول سنتر إلي يرفع الضغظ
في يوم شركة من الشركات اتصلت بيها وقالت ان فيه وظيفه سكرتيره في شركة كبيره، كل الشروط انها تعرف كمبيوتر وتتحدث الانجليزيه بطلاقه
نوفا قالت تجرب حظها وعلشان هي لبقه وتبيع الميه في حارة السقايين اقنعتهم بيها والشركة عينتها في وظيفه سكرتيره تنفيذيه وما ادراك ما السكرتيرة التنفيذيه
نوفا راحت الشغل الصبح ومفيش اي مشكله... طبعا هي بشوشه ولبقه واتعرفت علي الشركة كلها من اول يوم.. بس اللباقه والشياكه مش كل حاجه
في يوم موزا وهو راجع من بره دا بعد ما اقتنع اخيرا ان قاعدة القهوة ولعب الاستميشن مبيأكلش عيش وانه لازم يجي علي نفسه ويتعب شويه صغيرين ويحسن مهاراته فأخد كورسات يحسن فيها طريقة نطق الانجليزي.... دا غير انه قفل الشات واليوتيوب وبقي استاذ في الكمبيوتر .... المهم قابل نوفا قاعده علي باب العمارة وهاتك يا عياط/ ، مالك يا بنتي ايه الي حصل؟؟؟؟ قالتله طردوني من الشغل يا موزا
موزا قالها هو انتي لحقتي دا انتي بقالك اسبوع بس
طب بس احكليلي ايه الي حصل؟؟؟؟
ردت نوفا ولا حاجه مديري طلب مني ابعت جواب لسفارة اليابان علشان المهندسين الي هيسافروا وكتبت الجواب لكن مراجعتش عليه فكتبت كلمة اليابان غلط وايه يعني لما اغلط يعني... هي اخر الدنيا يعني ... وبعدين لو غلط يعني منبعت جواب تاني متصلح ايه المشكله هي نهاية العالم؟؟؟؟؟؟
المصيبه ان سكرتير القنصل اتصل اتريق علينا وقال.. ايه معندكوش منتج مكتوب عليه صنع في اليابان وطبعا رفض الجواب
طبعا موزا ما صدق نزل ضحك مش عارفه تكتبي اليابان .. فيه كده؟؟؟؟
طب يعني دلوقت اعمل ايه.. موزا قعد معاها واسترجع كل مهاراته التدريسية ومهاراته اللغويه كمان وعلي غير عادته استقطع من وقته الثمين وقعد يعلم نوفا تعمل ايه؟؟؟؟؟
بصي يا نوفا
- في المراسلات الرسمية لازم تكون صحيحة 100 % سواء من ناحية الشكل والمضمون واللغه... الخ
- لازم نكتب تاريخ اليوم الي صدر فيه الجواب من المؤسسه (يعني اليوم الي بعتنا فيه الجواب
- نكتب موضوع الرسالة (العنوان يعني الي الي عايزين نتكلم فيه
- لازم نتأكد قيل ما نبعت الجواب هنبعت لمين بالظبط (يعني نعرف اسمه ووظيفته) حتي لو كلفنا الامر اننا نتصل بالجهة الي هنبعتلها الخطاب ونتأكد من الاسم والوظيفه
- ونبتدي الخطاب بتحية واسم الي باعتينله الخطاب او وظيفته
- نمشي بمبدأ خير الكلام ما قل ودل يعني نخش في الموضوع من غير ما نطول
- الجواب غالبا بيكون 3 فقرات او اكثر علي حسب الموضوع
- الفقره الاولي شرح عام عن المؤسسه بيتكلم عن شركتنا مين في 3 سطور كده
- الفقره الي بعدها الموضوع الي احنا عايزين نتكلم فيه
- الفقره الاخيره شكر لطيف مع انتظار الرد
- التوقيع (دا موضوع مهم) لان التوقيع غالبا بيكون الاسم وتحته الوظيفه وتحته ارقام التليفون وتحتها البريد الالكتروني وبعدهم الموقع الالكتروني لو موجود واحيانا بعض الشركات بتحط اللوجو بتاعها
- الجواب لازم يتراجع مره واثنين وثلاثه واربعه لو امكن قبل ما نطبعه
غير كدا اقري يا نوفا علشان تتعلمي يعني ادخلي علي الانترنت واعملي بحث عن طريقة كتابة المراسلات الرسمية وشوفي اشكالها ايه ومن هنا هتتعلمي ازاي تكتبي خطابات رسمية، والتكرار يا نوفا بيعلم ايه؟؟؟؟
طب يا موزا دلوقت اعمل ايه؟؟؟؟ ولا حاجه يا نوفا ابتدي من جديد هو انتي بتغلبي؟؟؟ هههههههههه
واحمدي ربنا انهم مبعتوش جيش ساموراي يغتالك
ماشي يا موزا....ماشي
رشا خليفه
0 comments:
Post a Comment