النهارده جايه احكيلكم علي حاجه حصلت معايا شخصيا
بعد ما مشروع الفتيات الي كتبت بشتغل فيه تبع الأمم المتحدة...طبعا كنت من الي محسوبين بطالة مقنعه، المهم طب أعمل ايه؟؟؟؟ واشتغل ازاي؟؟؟؟
مش هنكر اني طبعا موزعه السيفي بتاعتي عند كل شركات التوظيف... سواء علي الانترنت او غيره.. المهم في يوم.. فتحت دولاب الخزين الي في المطبخ وطلعت اكياس الرز والمكرونه والتونه وكل ما تستهيه الانفس من منتجات، علي ظهر العلبه كان فيه عنوان الشركة والإدراة وكل حاجه
ثاني يوم ابتديت اتصل علي الشركات دول واقول عايزه ابعت ميل لمدير الموارد البشرية هو اسمه ايه؟ طبعا يقولولي الاسم، اقول طيب شكرا ميرسي واقفل
اليوم الي بعده اتصلت وطلبت المدير بالاسم منا عرفت اسمه اليوم الي قبله فالسكرتاريه كانوا بيفتكروني مهمه وطبعا شوية ثقه في النفس مع لباقة كنت بوصل... ناس كانت بتزحلقني وناس تقولي فوت علينا بكره، وناس تقولي سيبي رقمك وهو هيتصل بيكي، لحد ما اتصلت بشركة افكو وكلمت مدير الموارد البشرية، قلتله انا رشا بستخدم المنتج بتاعكم من زمان والحقيقة المنتج فظيع مريع جامد اخر حاجه ومن شدة اعجابي بالمنتج اتمنيت اني اشتغل في شركة الناس بتثق فيها كده
المهم الراجل قالي هو حضرتك بتتكلمي جد ولا بتهزري؟؟؟؟
قلت لا جد طبعا يا فندم
قالي طب تعالي قبليني بكره وهاتي السيفي معاكي
لبست الحته الزفره ورحت علي الشركه
المدير قالي علي فكره انا قابلتك بس لاني لقيتك مختلفه والي بيدور علي الفرصه يستحق انه يا خدها
وفعلا اشتغلت منسقة مبيعات واتعلمت هناك اكتر مما كنت اتخيل
انا بحكيلكو الحكاية دي عشان اقول ان الي بيعوز يتصرف بيتصرف مييستناش لما حد يقولو يعمل ايه؟؟؟
يعني الشباب الي بتبعتلي وتقولي اروح ازاي عنواين الشركات ماليه الدنيا ، جرب وحاول ودور والي يسأل ميتوهش بس وانت بتسال خلي سؤالك ذكي
رشا خليفه
0 comments:
Post a Comment